1. О молодом
[Aṣṭāṅgahṛdayasaṃhitā]
yadbālamavyaktarasaṃ kiñcitkṣāraṃ satiktakam||102||
tanmūlakaṃ doṣaharaṃ laghu soṣṇaṃ niyacchhati||102||
gulmakāsakṣayaśvāsavraṇanetragalāmayān||103||
svarāgnisādodāvartapīnasāṃśca---------------||103||
[Sarvāṅgasundarā]
yanmūlakaṃ bālaṃ, avyaktarasaṃ-asphuṭāsvādam, tathā kiñcitkṣāraṃ-īṣatkṣāraguṇayuktaṃ kāryato+anumīyamānam, tathā satiktaṃ-īṣattiktakaṃ rasanendriyasya kiñcidudvejakam, tanmūlakaṃ doṣāṇāṃ haraṃ-doṣaharam, nānyāvastham| bālaṃ mūlakaṃ doṣaharamityanenāsya viśiṣṭā bālāvasthā doṣaharatvena niyamyate| na sarvaṃ bālāvasthaṃ doṣaharam, api tvīdṛgrūpamityarthaḥ| anye tu doṣayorharaṃ-doṣaharam, ityatra samāsaṃ kṛtvā |vātaśleṣmaghnatvamevāsya pratijānate| yataḥ kiñciduṣṇavīryatvāt pittakaratvamasyāstyeva| kiñcittiktarasopetatvena pittakartṛtvamasya vyāhartuṃ na yuktam| vakṣyati hi (hṛ.sū.a.9|25)-"rasaṃ vipākastau vīryaṃ prabhāvastānyapohati|" iti| evaṃ caitanmūlakaṃ vātaśleṣmaghnameva yuktam, na tu pittahṛcca, iti teṣāmabhiprāyaḥ| etacca mūlakaṃ gulmādīnniyacchati| pīnasāṃśceti caśabdaḥ samuccaye| anyānapyevaṃprāyān rogānniyacchatīti| suśrutastu (sū.a.46|240)-sarvadoṣaharā laghvī kaṇṭhyā mūlakapotikā|" iti yadbhedāntaramūce, tadapyatraiva bālamūlakalakṣaṇe+antarbhūtamiti tantrakṛteha pṛthaṅnoktam|
[Āyurvedarasāyana]
atha mūlakaguṇānāha| tatra bālamūlakaguṇānāha-yadbālamiti| bālaṃ-komalam| tasya tisro+avasthāḥ,-prathamamavyaktarasam, tata īṣallavaṇam, tata īṣattiktam| tadavasthātraye+api doṣaharatvādiguṇam| svarāgnyoḥ sādaḥ|
___
2. О вызревшем
[Aṣṭāṅgahṛdayasaṃhitā]
-------------------------------mahatpunaḥ||103||
rase pāke ca kaṭukamuṣṇavīryaṃ tridoṣakṛt||104||
gurvabhiṣyandi ca------------------------||104||
[Sarvāṅgasundarā]
avyaktarasādilakṣaṇāvasthāṃ vihāya yāvadvyaktarasādyavasthaṃ tatsampadyate| tato+anantaraṃ krameṇa rasavipākayoḥ kaṭukamuṣṇavīryaṃ tanmūlakaṃ mahat-vṛddhaṃ tridoṣakṛd gurvabhiṣyandi ca bhavati| vṛddhasya ca mūlakasyānekā avasthāḥ sambhavanti| tatra cāsyādyāvasthāyāṃ kiñcittridoṣakṛttvam, antyāvasthāyāṃ tvatiśayena tridoṣakṛttvaṃ vedyam| saṅgrahe (sū.a.7) tvasya svāduvipākitvamuktam| tatpāṭhe-"mahatpunaḥ| rūkṣoṣṇaṃ kaṭukaṃ svādu vipāke sarvadoṣakṛt||" iti| taccāmaviṣayam|
[Āyurvedarasāyana]
mahadguṇānāha-mahatpunariti| mahat-jaraṭham| saṅgrahe tu svādupākamuktam (sū.a. 7)-"mahatpunaḥ| rūkṣoṣṇaṃ kaṭukaṃ svādu vipāke sarvadoṣakṛt||" iti| taccāmaviṣayam| tathā ca khāraṇādiḥ-"rūkṣaṃ vidāhi tīkṣṇoṣṇaṃ kaṭukaṃ svādu pacyate| utkledi stambhi gurvāmaṃ mūlakaṃ trimalolbaṇam||" iti| agnipakvaṃ tu kaṭupākameva|
___
3. О приготовленном на огне в масле
[Aṣṭāṅgahṛdayasaṃhitā]
---------------snigdhasiddhaṃ tadapi vātajit||104||
[Sarvāṅgasundarā]
apiśabda evārthe| tadeva-mahanmūlakaṃ snigdhasvinnaṃ vātajit| snigdhaṃ ca tatsvinnaṃ ca snigdhasvinnam| na tvasnigdhasvinnmātramityarthaḥ|
[Sarvāṅgasundarā]
snigdhasiddhaguṇānāha-snigdhasiddhamiti| snigdhairghṛtamāṃsarasādibhiḥ sādhitaṃ-snigdhasiddham| yaddoṣalaṃ mahadapi snigdhasiddhaṃ vātaghnam| kiṃpunaryaddoṣaghnaṃ bālam ? ityapiśabdārthaḥ|
___
4. О сушёном
[Aṣṭāṅgahṛdayasaṃhitā]
vātaśleṣmaharaṃ śuṣkaṃ sarvam-----------||105||
[Sarvāṅgasundarā]
sarvaṃ-bālaṃ vṛddhaṃ ca mūlakaṃ, śuṣkaṃ sat vātaśleṣmaharam|
[Āyurvedarasāyana]
śuṣkaguṇānāha-vātaśleṣmaharamiti| tadapītyanuvartate| pūrvavadapiśabdārthaḥ|
___
5. О сыром, без термообработки
[Aṣṭāṅgahṛdayasaṃhitā]
----------------------------āmaṃ tu doṣalam||105||
[Sarvāṅgasundarā]
āmaṃ punarmūlakaṃ haritakatvena yadbhakṣyate taddoṣalam| sarvamityatrāyatnakṛtena sambandhena sambadhyate| tenādoṣalasya bālasyāpyāmasya doṣalatvam, na tu vṛddhasyaivetyarthaḥ| mūlakaṃ nīlakaṇṭhāparasaṃjñam|
[Āyurvedarasāyana]
āmaguṇānāha-sarvamiti| sarvaṃ-bālaṃ mahacchukamārdraṃ ca| āmaṃ-anagnipakvam|
